Vedenga kişwerên omîdan
Gotina xweş
Bihara dila ye
Tabloya hîn jî ker û lal
Wiha…
Ji qutiya rengan re digot…!
Ji nîvê valahiyê
Û ji kûrahiya nexşereyên axê
Şahmaranê…
Kajê tozgirtî
Ji ser bedena xopan radikir
Û ji nuh…
Ber bi destên werzan ve
Dibarî…!
Gulşevînên qurmizî û mest
Vedenga kişwerên omîdan…?!
****************
Û rûpelek…
Ji hevrîşimê berbangê
Û çarîneke bi doşava tavesorkê
Şewşenkirî
Wiha bêdengiyê
Sîtavên xwe…
Li kom û kolozên heyînê
Weşî bi weşî
Vedigerandin…!
Û rista ezberkirî
Ji xemreya cemalê
Her ku şev konê xwe vedike
Gelawêj…
Digihêje meqamê kemalê!
Bi hêminî…
Rist ji kûzên asoyê
Tête nohtin…
Razber e ev hebûn
Bê ser û ber e gerdûn
Û Xwedayê li jor
Rezvan…
Û sazvanê cam û piyalê…?!
***************
Gotina xweş
Merhema birîna ye
Çivîka ji perên kakêşanê
Veqetiyayî
Wiha…
Qehwerengê darîn
Û dilkê keskîniyê
Ji xwe re hêlîn dinikuland…!
Tovê bi firmêskên hezê nixumandî
Çend rojan û vejînek…
Digihêje destên seridînê…!
Sinbilên bi libên xwe tije
Wiha kubar û paye
Sernişîvî rûdêmên axê dibin
Zêrê zer e
Zadê bi vegotinên biharê avdayî
Û nemaze ku tête heyranbêjiya çinînê…?!
***************
Gotina xweş
Şekirokê cejna ye
Şerbeta di paşşanan de teyisî
Li Xameya bêcir
Pîrozbahiya spêdeyê vedaye
Û ronê ji tilîkên Elindê
Weriyayî…
Di sebeta sîngê de
Paldaye…!
Û askên bezok di mêrgên hesatan de
Berfînên nazenîn di merdaniya destan de
Û ciwanîka…
Ji zeviyên spêdeyê hilperikî
Wiha lezgîn
Û careke dinê
Vedihewe
Arana di çavan de…!
***************
Gotina xweş
Bexçeyê gula ye
Û tu….
Ey gul, eger tu nazenîn î
Kengî tu, ji rengê rûyê zîn î ?
Wiha Xanî…
Kiras û xiftanê welatê xwe dirêsî
Rîsê bi hilma meya kevnar
Rêsayî
Bi hiriya beranê boz
Badayî
Û ji keziyên bozê rewan
Û ji miska gulyên karxezala
Di kevanên çavên Memê de
Zînegulek…
Û bilindahiya çiyayê miradê
Tîrvedan
Tîrêj
Û tîr dirêjî…!
Ey durdaneya
Ji zadê zarê şêrîn
Wiha mîr…
Morî bi morî
Pir sedef û mircan
Û yek gerden
Bejna xakê dirêsî
***************
Gotina xweş…?!
Û bi hêminî
Gotin di xumên siruştê de
Tête meyandin…
Ristezar û zerpîvok e
Mizgîn î û gulbihok e
Gulav, enber
Û bîn şimakok e
Sorgul, roz
Û bask kevok e
Li ser lêvên Newrozê
Xizêm û xalxalok e…!
Di meşka rewanê de
Tête keyandin
Hunerbaz û têr leystok e
Şînê deryayê
Û asîmanekî tijî stêr
Û rojan şînok e
Risteke bi awaz û sazî
Dilberek por zêrîn
Û can pir gijlok e…!
*****************
Gotina xweş…?!
Û gotin…
Ya law û xweşkok e..!
Ey durdaneya…
Ji zadê zarê rengizîn
Di bêdengiyê de
Gul…
Sirûd vedibin
Mijankên êvaran
Perwane bi êgir ve
Disojin
Û destên ducanî
Rist dirijin…!
Razber e ev hebûn
Bê ser û ber e gerdûn
Û Xwedayê mihrevan
Rezvan…
Û danerê kilçîv û şemalê
Ji bilî beyteke dariştî
Bi yaqûtê zarê hingivîn
Çi Êdî …
Derdan dimalê…?!
Gotina xweş, bihara dila ye= ji zargotina Kurdî.
Ey gul, eger tu nazenîn î = Ji beytên Seydayê Xanî.
Cemal. Kemal= Ji Sovîzimê. Bi Erebî.
Mîr= Ciladet Bedirxan.
