Kawa Nûrî Seydê
Bêjine bav û dê…
Şervan nema tê
Çek hildaye û çûye cengê
Tevlî refên tekoşînê
û şoreşgerên serxetê
Bêjine bav û dê…
Gulebaranê dest pê kiriye
ji berbanga vê sibê
Gur kom bûne li dorê
Şervan bi tenê di nava berfê
de maye asê
Yek gule li sîng xistine
û du li piştê
Xwîna germ gihiştiye çokê
Sor bûye rengê berfê
Şervan nema deng jê tê
Dengê ewrên bombebaranê
ji Geliyê Zîlan tê
Bêjine bav û dê…
Çar lehengên dozê
Sûnd xwarin bi navê Xwedê,
ku roja tolhildanê
di demek nêz de tê
Bêjine
Bûka xemilandî li ser hespê Zavayê
Te nema tê
Çû serdana Xwedê
