Mizgîn Hesko
Bayê payîzeke sirt
Û xuşîna spêdeyeke
Pelweriyayî !
Li vê joriya sosret
Masiyên zêrîn
Bi perên xwe ên nihênî ve
Ber bi kişwerên avînê ve
Dilivin…!
Û perwaneyên sipî
Di paşila gulhêviyan de
Biharên ji hevrîşim
Didirêsin !
Bayê payîzeke sirt
Û xuşîna spêdeyeke
Pelweriyayî…
Û ev daristana bejn bilind
Di nav biskên leylanê de
Bi sîbera xwe ve
Avjen…!
Û destên min
Bi şifreya keservedanê ve
Mijûlin….
Dema ku li aliyên lavijê
Mukir tên
Û awazên pêdariyê
Ji tenên keserê
Dijenînin…!
Ew destên te ne
Yan şaxên daristanê ne
Yan jî…
Niviştên omîdên sêgoşe ne…?!!
Di pêşbaziya bi payîzê re
Dil hînî sews û meyweyên
Payîzokan dikin…?!
