Ez kî me?
Ji min nepirsin: ez kî me?
Ez penaberekî rêwî me
Ez ne tî me û ne jî birçî me
Ez ji tirsa Allah û tekbîra wan,
di tariya şevê de revî me
Ji destê bêmirovetiyê çendîn westî me
Hem şerpeze û hem jî basik şikestî me
Ez împeratoriyeka têçûyî me
Xwedî şaristaniyeka şewitî me
Ez Kurdiya petî û hîmî me
Ez bisk û kezî yên li ser dêm û gepên
pênc hezar keçên Êzdî me
Xwedî simbêlên qeytanî me
Xwedî kiras, şal û şapikên spî me
Ez taw im û sî me
Ji min nepirsin: ez çend salî me?
Ez ayîneke pir kevnar im
Ez ji bêhna Temûz û Eştar im
Ez bîrdanka êşa heftê û çar fermanan im
Ji min nepirsin: xwediyên min kî ne?
Nîvê wan di komkujiyan de,
wek kafiran kuştî ne
Nîvê din di bazaran de,
wek koleyan firotî ne
Hûn dizanin ez kî me?
Ez Şengala sêwî me.
